«Ньюкасл» клуби мухлисларидан бири Англия Лига кубоги финали чиптасини ғажиб ташлаган Руди лақабли итига жиддий ҳукм ўқиди.

Соҳибини финал чиптасидан маҳрум қилган ит сотилади! Нархи ҳам тайин - атиги 5 фунт стерлинг. Ажабо, бу ҳазилми ёки...?

Англия Лига кубоги финали чиптасидан айрилган «Ньюкасл» мухлисининг исм-шарифи - Алан Керлинг. У 18 февраль куни ўтказилган «Ньюкасл» - «Ливерпуль» ўйинидан сўнг уйига тушкун кайфиятда қайтди. Бинобарин, «қарғалар» 0:2 ҳисобида ютқазишди, камига Эдди Хау жамоасининг АПЛда 17та ўйинга чўзилган мағлубиятсиз одими узилди. Қарангки, аламзада фанат уйга киргани ҳамоно Англия лига кубоги финалига сотиб олган чиптасини бурдалаб ташланган ҳолатда кўрди. Энди унинг қандай жазавага тушганини ўзингиз тасаввур қилиб олаверинг...

Хуллас, Керлинг ўз итига уруш очди ва «Фейс­бук» тармоғида уни сотувга қўйганини эълон қилди. «Бу - менинг итим Руди. Кичик юлдузчага айланган ярамас кучукча уйимизга почта орқали юборилган хатларни тажоввузкор ҳужум сифатида кўриб, уларни ўз ўрнида йўқотишга тушади. Мана, Руди бу сафар мен йўқлигимда «Уэмбли»га кириш ҳуқуқини берувчи чиптани чайнаш ташлабди. Эҳтимол, у бу билан мени кулдирмоқчи бўлгандир. Лекин ҳукм қатъий - ит 5 фунт стерлингга сотилади», - деб ёзган Алан Керлинг Руди суратини ҳам ҳавола қилди. Эҳтимол, бу ҳазилдир, буни Аланнинг ўзи билади. Маълумот учун, «Ньюкасл» 26 февраль кунига белгиланган Англия лига кубоги финалида «МЮ»га қарши ўйнайди.