OKMK Olmaliqda Navoiyning «Qizilqum» jamoasini qabul qildi. O‘yin yopiq eshiklar ostida o‘tkazildi.

Uchrashuv qiziqarli kurashlarga boy o‘tdi. Dastlabki daqiqalardan jamoamiz ustunlikni o‘z qo‘liga oldi. Ko‘plab hujumlar uyushtirildi. 25-daqiqada burchak zarbasidan so‘ng Sardor Rahmonov mehmonlar darvozasiga xavf soldi, ammo hisob ochilmadi. Shundan so‘ng jamoamiz hujumlari kuchaya boshladi. 37-daqiqada yigitlarimiz penalti ishlashdi. Ruben Sanches nuqtadan adashmadi – 1:0

Shuningdek, ikkinchi bo‘limda ham jamoamiz to‘p nazoratida ustunlik qilishdi. Himoya chizig‘imiz anchayin tartibli harakat qildi. 64-daqiqaga kelib jamoamizning ko‘p sonli hujumlaridan birida Mirjamol Qosimov darvoza tomon kuchli va aniq zarba yo‘lladi, ammo gol bo‘lmadi. 67-daqiqada ajoyib kombinasiyadan so‘ng Oybek Rustamov Xurshid G‘iyosovni qulay uzatma bilan ta’minladi va Xurshid to‘pni darvozaga joyladi – 2:0

Ushbu hisob uchrashuv yakuniga qadar saqlanib qolindi va navbatdagi g‘alaba tantana qilindi.

Nazorat o‘yini
26 fevral, yakshanba
OKMK – «Qizilqum» 2:0
Gollar: Sanches (36-pen), G‘iyosov (67)
OKMK - (4-3-3) Valijon Rahimov – Dilshod Ahmadaliyev, Abdulla Abdullayev, Sardor Rahmonov, Vitaliy Denisov – Oybek Rustamov, Mirjamol Qosimov, Siavash Xaqnazariy, Irakli Rukhadze, Ruben Sanches, Shohruh Gadoyev
Ikkinchi bo‘limda maydonga tushganlar – Muhammad Ali Salim, Anzur Ismoilov, Xurshid G‘iyosov, Akramjon Komilov, Mirjahon Mirahmadov, Eldorbek Begimov, Martin Boake, Muhammadanas Hasanov, Sirojiddin Bashriddinov

Ushbu nazorat o‘yini OKMK uchun so‘nggisi bo‘ldi. Keyingi uchrashuv rasmiy o‘yin hisoblanadi. Superliga doirasida OKMK 1-turda «Surxon» jamoasiga qarshi bahs olib boradi. Uchrashuv «Paxtakor» stadionida soat 14:00da start oladi.