Poytaxtimizdagi bir qator maktab, kollej va institutlar bilan hamkorlikni yo‘lga qo‘ygan, o‘quvchi-yu, talabalarni tabiiy holda, o‘z xohishi bilan stadionga tashrif buyurishini ta’minlash maqsadida turli uchrashuvlarni o‘tkazishni odatga aylantirgan “Bunyodkor” o‘z an’anasini davom ettiradi.

Kecha jamoamiz rasmiylari O‘zbekiston Davlat jahon tillari universitetining Rus tili filologiyasi fakultetiga tashrif buyurdi. Uchrashuv avvalida dastavval talabalarga “Bunyodkor” jamoasi haqida to‘liq ma’lumot berildi. O‘quvchilar klubning tarixidan tortib, bugungi kunigacha bo‘lgan barcha ma’lumotlardan voqif bo‘lishdi. So‘ng talabalar o‘zbek futbolining og‘riqli nuqtalariga oid savollar bilan murojaat qilishdi. Tabiiyki, barcha savollarga batafsil va qoniqarli javob qaytarildi. Tadbir yakunida faol talabalarga esdalik sovg‘alari taqdim qilindi.

Uchrashuv yakunida institut bilan “Bunyodkor” futbol klubining o‘zaro hamkorligi shu bilan to‘xtab qolmasligi aytildi va o‘zaro rejalar muhokama qilindi.