Superliganing 1-turi doirasida safarda “Turon”ni mag‘lub etgan “Buxoro” klubi bosh murabbiyi Hakim Fuzaylov uchrashuvda uning shogirdlari borini berib o‘ynagani, raqibning tanish ekani va yangi qo‘shilgan legionerlar haqida fikr bildirdi.

“Avvalo, o‘yin uchun barcha futbolchilarga minnatdorchilik bildiraman. Ular bugun maydonda borlarini berib o‘ynashdi. Qiyin uchrashuvda qiyin g‘alabaga erishdik. Mavsum avvalida o‘yin borasida fikr bildirish qiyin. Yaxshi o‘ynasak, natija ham kelaveradi”, - deydi Fuzaylov.

“Bu raqib albatta tanish va ularga qarshi o‘tgan mavsumda ham o‘ynagandik. Ular haqida yetarlicha ma’lumotlarimiz bor. Ammo, mavsum avvalida ularning qanday holatda ekani haqida tasavvurimiz yo‘q edi”.

“Yangi futbolchilar haqida fikrlarim ijobiy. Stanisaviyevich yaqinda kelib qo‘shilgan bo‘lsa ham yaxshi futbolchi ekani ko‘rinib turibdi. Unga bizdan boshqa yana haridorlar bor edi. Yig‘inlarda biroz jarohat olgani bois, hali to‘liq o‘yin amaliyotiga ega emas”.