Yurtimizda o‘tayotgan 20 yoshgacha bo‘lgan Osiyo chempionati bahslari davom etmoqda. Bugun C guruhida ham 3 tur bahslari o‘tkazildi. Unda Iordaniya va Ummon yoshlari to‘qnash kelishdi. O‘yin 0-0 hisobidagi durang bilan yakunlandi. Bahs yakunida har ikki jamoa murabbiylari o‘z fikrlarini bildirib o‘tdi. Guruhda 3 ta tur natijasiga ko‘ra, Iordaniya  4 ochko to‘plagan holda keyingi bosqich yo‘llanmasini qo‘lga kiritdi. Shuncha ochko yig‘gan Ummon esa guruhda qolib ketdi. Ummonliklar ustozi David Gordo bu haqida shunday deydi:

"Avvalo, raqibni keyingi bosqich bilan tabriklayman. O‘yin qiyin kechdi. Juda ham gol urishga harakat qildik. Bizga bu o‘yin tajriba bo‘ladi. 

Qanday o‘zingizni his qilyapsiz? O‘zingiz uchun nimalar oldingiz?

O‘ylaymanki, bu turnir bizga dars bo‘ldi. Raqib ancha kuchli edi. G‘alaba o‘z qo‘limizdaligini bilardik. Vaziyatlar ko‘p edi. Ammo qaror qabul qilishda muammolarga duch keldik. Kelajakda, muammo va kamchiliklar ustida ishlaymiz.

Tashkilotchilik borasida qanday muammolarga duch keldingiz?

"Hammasi ajoyib. Ob-havo, odamlar, muhit. Ammo bizga eng katta muammo tug‘dirgan narsa, bu mashg‘ulotlar maydonlarining qoniqarsiz ekanligi edi. Bunday maydonlarda, o‘yinchilarning jarohat olishi hech gap emas".

Shuningdek, Iordaniya bosh murabbiyi Islom Jamil Aldiabat ham fikrlari bilan o‘rtoqlashdi:

"Hammaga assalomu alaykum. Bu o‘yinning yakunidan juda ham xursandman. Bugungi raqib juda ham kuchli edi. Ummon bizga qattiq qarshilik ko‘rsatdi. Ammo kuchli iroda bilan biz o‘z maqsadimizga erishdik. Aytishim kerakki, ushbu bahs nafaqat men, balki futbolchilar uchun ham o‘ta muhim uchrashuv edi. Ummon doimo raqiblarni qiynay olgan.

Hozir keyingi bahslarni o‘ylashimiz kerak. Raqibning ruhiyati o‘ta kuchli ekan. Ammo bizda yaxshi intizom bor edi. Bu orqali kerakli natijaga erisha oldik deb o‘ylayman. Bugun biz bir jamoa kabi emas, balki bir oiladek, aka-ukalardek harakat qildik. Keyingi raqiblarni kuchli bo‘lishini bilamiz. Ammo biz har qanday o‘yinga tayyormiz".

Ismatov J.