Shu kunlarda yurtimizda davom etayotgan yoshlar o‘rtasida (U-20) Osiyo Chempionatini bevosita voqea joyidan kuzatayotgan «Krasnodar» futbol klubi Akademiyasi vakillari «Bunyodkor» futbol Akademiyasiga tashrif buyurdi. Jumladan, Anatoliy Dmitriyev («Krasnodar» futbol klubi Akademiyasi selekiya ishlari bo‘yicha direktor o‘rinbosari) hamda Vyacheslav Yegorov («Krasnodar» futbol klubi Akademiyasi seleksioneri) «Bunyodkor» futbol klubi va Akademiyasi mas’ul mutasaddilari bilan uchrashdi.

O‘zaro muloqat davomida ikkala futbol Akademiyalar o‘rtasida hamkorlikni o‘rnatish, o‘zaro aloqalarni mustahkamlash, yosh futbolchilarni almashish ishlarini yo‘lga qo‘yish, murabbiylar malakasini oshirish, turli yosh toifalari ishtirokida o‘rtoqlik uchrashuvlari va turli ko‘rinishdagi musobaqalarni tashkil etish borasida kelishib olindi. Shundan so‘ng, mehmonlar «Bunyodkor» futbol Akademiyasida yosh futbolchilarga yaratilgan shart-sharoitlar bilan yaqindan tanishish imkoniga ega bo‘lishdi. Qolaversa, Akademiyaning yotoqxonalari, oshxonasi, basseyni, tibbiyot bo‘limi, sport zal, trenajyor zali, fitnes, futbol maydonlari, o‘quv sinf xonalarini (rus tili, anatomiya, ingliz tili, psixologiya) ko‘zdan kechirishdi.

Ayniqsa, «Bunyodkor»  futbol Akademiyasi psixologi Marina Dorfmanning psixologiya bo‘yicha 2007 yilda tug‘ilgan o‘smirlar jamoasi a’zolari bilan o‘tkazgan mashg‘ulotlari rossiyalik futbol funksionerlarida iliq taassurot qoldirdi. Uchrashuv yakunida tomonlar o‘zlarining esdalik sovg‘alarini taqdim etishdi.