Шу кунларда юртимизда давом этаётган ёшлар ўртасида (U-20) Осиё Чемпионатини бевосита воқеа жойидан кузатаётган «Краснодар» футбол клуби Академияси вакиллари «Бунёдкор» футбол Академиясига ташриф буюрди. Жумладан, Анатолий Дмитриев («Краснодар» футбол клуби Академияси селекия ишлари бўйича директор ўринбосари) ҳамда Вячеслав Егоров («Краснодар» футбол клуби Академияси селекционери) «Бунёдкор» футбол клуби ва Академияси масъул мутасаддилари билан учрашди.

Ўзаро мулоқат давомида иккала футбол Академиялар ўртасида ҳамкорликни ўрнатиш, ўзаро алоқаларни мустаҳкамлаш, ёш футболчиларни алмашиш ишларини йўлга қўйиш, мураббийлар малакасини ошириш, турли ёш тоифалари иштирокида ўртоқлик учрашувлари ва турли кўринишдаги мусобақаларни ташкил этиш борасида келишиб олинди. Шундан сўнг, меҳмонлар «Бунёдкор» футбол Академиясида ёш футболчиларга яратилган шарт-шароитлар билан яқиндан танишиш имконига эга бўлишди. Қолаверса, Академиянинг ётоқхоналари, ошхонаси, бассейни, тиббиёт бўлими, спорт зал, тренажёр зали, фитнес, футбол майдонлари, ўқув синф хоналарини (рус тили, анатомия, инглиз тили, психология) кўздан кечиришди.

Айниқса, «Бунёдкор»  футбол Академияси психологи Марина Дорфманнинг психология бўйича 2007 йилда туғилган ўсмирлар жамоаси аъзолари билан ўтказган машғулотлари россиялик футбол функционерларида илиқ таассурот қолдирди. Учрашув якунида томонлар ўзларининг эсдалик совғаларини тақдим этишди.