Yaqinda “Andijon” jamoasiga taklif qilingan va shartnoma tuzgan tojikistonlik tajribali himoyachi Axtam Nazarov O‘zbekiston Superligasida debyutini o‘tkazganidan xabardorsiz.

U “Andijon” libosidagi dastlabki rasmiy bahsda “Nasaf” ustidan muhim g‘alaba qo‘lga kiritilishida salmoqli hissasini qo‘shdi va shu tariqa uning debyuti muvaffaqiyatli chiqdi.

Bilasiz, Axtam Tojikiston milliy terma jamoasining yetakchilaridan biri hamda sardori hisoblanadi.

Yaqinda Tojikiston terma jamoasi BAAning Dubay shahrida navbatdagi o‘quv-mashg‘ulot yig‘inini o‘tkazadi.

U yerda ikkita nazorat o‘yini tashkillashtirilgan. Jumladan, Tojikiston 25 mart kuni BAAga, 28 mart sanasida esa Quvayt terma jamoasiga qarshi maydonga tushadi.

Shu bois Tojikiston termasi bosh murabbiyi Petr Segrt Nazarovni ham ushbu yig‘inga jalb qilgan. Bu borada Tojikiston futbol federasiyasidan “Andijon” klubiga rasmiy taklifnoma keldi.

“Andijon”ning 3-turda “Bunyodkor”ga qarshi uchrashuvidan keyin Nazarov Tojikiston terma jamoasi ixtiyoriga jo‘nab ketadi.