Pro-liga 1-tur “Sho‘rtan” — “Qo‘qon-1912» 3:3 uchrashuvidan so‘ng mehmonlar yordamchi murabbiyi Shavkat Abduxo‘jayev o‘yin haqida o‘z fikrlarini bildirib o‘tdi.

"Pro-liga boshlanishi munosabati bilan hammani tabriklayman. Bugungi o‘yin shuni ko‘rsatdiki Pro-Ligada ham ochko olish oson bo‘lmaydi. Bu yerdagi raqiblar ham jiddiy qarshilik ko‘rsatishiga amin bo‘ldik.

Bizning jamoa birinchi bo‘limda 3:0 hisob bilan oldinda edi. Ikkinchi bo‘limda yigitlar ozgina bo‘shashishdi. Futbol hakam hushtagi yangragunga qadar davom etishini esidan chiqarishdi va g‘alaba qozondik deb o‘ylashdi.

“Sho‘rtan” jamoasi to‘g‘risida gapirsam, jamoaga juda yaxshi saviyadagi futbolchilar jalb qilinibdi. Kuchli jamoalar bilan bellasha oladigan jamoa shakllanibdi.

Joriy mavsumdagi maqsadimiz yana Superligaga qaytish. Shu maqsad yo‘lida ishlashda davom etamiz. Xatolar ustida ishlash kerak. Ishimiz hali juda ham ko‘p. Keyingi o‘yinlarda “Sho‘rtan” jamoasiga omad tilab qolamiz.

Birinchi bo‘limda 3:0 hisob bilan oldinda borayotgan edik. Oddiy xatolardan gol qo‘yib yuborish bu oliy maqsad quyilgan jamoa uchun juda qimmatga tushishini yana bir bor buni isbotladi. Har bir vaziyatda futbolchilarga bo‘shashmasdan oxirigacha o‘ynashini kerakligini keyingi o‘yinlarda tushuntirishga harakat qilamiz", — dedi Abduxo‘jayev.

"Sho‘rtan" PFK matbuot xizmati