Joriy mavsumda Qozog‘iston chempionatida ishtirok etayotgan "Humo" xokkey klubi ilk urinishdayoq pley-off bosqichi finaliga chiqdi.

Jamoamiz bugun ham Qozog‘istonning "Beybaris" klubiga qarshi beshinchi o‘yinni o‘tkazdi.

Birinchi bo‘limda hisob ochilmagan bo‘lsa, ikkinchi taym o‘rtalarida toshkentliklar Aleksey Kirillov tomonidan urilgan gol evaziga oldinga o‘tib olishdi.

Uchinchi bo‘limning dastlabki daqiqalari "Humo" omadli chiqdi. 45-daqiqada Denis Shurakov hisobni 2:0 ko‘rinishga keltirdi.

O‘yin tugashiga 5 soniya qolganida "Beybaris" bitta javob shaybasini kiritdi.

Shu tariqa, "Humo" yarim final seriyadagi hisobni 4:1 ga yetkazdi va final masalasini hal etdi. Jamoamiz chempionlik uchun Qozog‘istonning "Nomad" klubiga qarshi seriyada ishtirok etadi. Ushbu jamoa muntazam chempionatda 4-o‘rinni egallagan bo‘lib, yarim finalda "Sariarqa" jamoasini 4:1 hisobida mag‘lub etdi.

Dastlabki o‘yinlar 2 va 3 aprel kunlari Toshkentda, keyingilari esa 7 va 8 aprel kunlari Astanada o‘tkaziladi.

Xokkey. Qozog‘iston chempionati. Yarim final, 5-o‘yin
"HUMO" - "BEYBARIS" - 2:1 (0:0, 1:0, 1:1)
Gollar:
31:18. 1:0 — Aleksey Kirillov
44:25. 2:0 — Denis Shurakov
59:55. 2:1 — Artyom Rasulov