Жорий мавсумда Қозоғистон чемпионатида иштирок этаётган "Ҳумо" хоккей клуби илк уринишдаёқ плей-офф босқичи финалига чиқди.

Жамоамиз бугун ҳам Қозоғистоннинг "Бейбарис" клубига қарши бешинчи ўйинни ўтказди.

Биринчи бўлимда ҳисоб очилмаган бўлса, иккинчи тайм ўрталарида тошкентликлар Алексей Кириллов томонидан урилган гол эвазига олдинга ўтиб олишди.

Учинчи бўлимнинг дастлабки дақиқалари "Ҳумо" омадли чиқди. 45-дақиқада Денис Шураков ҳисобни 2:0 кўринишга келтирди.

Ўйин тугашига 5 сония қолганида "Бейбарис" битта жавоб шайбасини киритди.

Шу тариқа, "Ҳумо" ярим финал сериядаги ҳисобни 4:1 га етказди ва финал масаласини ҳал этди. Жамоамиз чемпионлик учун Қозоғистоннинг "Номад" клубига қарши серияда иштирок этади. Ушбу жамоа мунтазам чемпионатда 4-ўринни эгаллаган бўлиб, ярим финалда "Сариарқа" жамоасини 4:1 ҳисобида мағлуб этди.

Дастлабки ўйинлар 2 ва 3 апрель кунлари Тошкентда, кейингилари эса 7 ва 8 апрель кунлари Астанада ўтказилади.

Хоккей. Қозоғистон чемпионати. Ярим финал, 5-ўйин
"ҲУМО" - "БЕЙБАРИС" - 2:1 (0:0, 1:0, 1:1)
Голлар:
31:18. 1:0 — Алексей Кириллов
44:25. 2:0 — Денис Шураков
59:55. 2:1 — Артём Расулов