O‘zbekiston futbol assosiasiyasi tomonidan terma jamoalar faoliyati bilan bog‘liq yaqin va uzoq muddatli loyiha va rejalar amalga oshirib kelinmoqda. Jumladan, 2028 yilda bo‘lib o‘tadigan Olimpiada o‘yinlariga tizimli va sifatli tayyorgarlik ko‘rish maqsadida 2005 yilda tug‘ilgan futbolchilardan iborat «Olimpik farm» jamoasi tashkil etildi.
O‘FA birinchi vise-prezidenti Ravshan Ermatov yig‘in o‘tkazayotgan jamoaning mashg‘ulotlarida ishtirok etib, murabbiylar shtabi bilan tashkil etilayotgan yig‘inlar tahlili, futbolchilarning holati va imkoniyatlari, shuningdek, yaqinlashib kelayotgan musobaqalarga tayyorgarlik rejalari xususida suhbatlashdi.
2028 yilda Los-Anjelesda bo‘lib o‘tadigan Olimpiada o‘yinlariga reja asosida, tizimli tayyorgarlik ko‘rish zarur ekanligini ta’kidlandi. Rahbariyat futbolchilarga oldinda turgan nufuzli musobaqaga bor kuch va g‘ayratlari bilan tayyorgarlik ko‘rish kerakligi aytilib, ularga omad tiladi.
