Kataloniyaning "Barselona" jamoasida to‘p surayotgan hujumkor yarim himoyachi Usmon Dembele faoliyatini Germaniya Bundesligasida davom ettirishi mumkin. Todofichajes jurnalistlarining xabar berishicha, 25 yoshli vingerga "Bavariya" qiziqish bildirmoqda.
Dembelening transferi tashabbuskori "Bavariya"ning yangi bosh murabbiyi Tomas Tuxeldir. Mutaxassisning fikricha, Usmon jamoaning hujum chizig‘iga yaxshi mustahkamlovchi bo‘ladi.
Fransiyalik futbolchining "ko‘k-anorranglilar" bilan shartnomasi kelasi yozgacha mo‘ljallangan. Futbolchining transfer narxi 60 million yevroga baholanmoqda.
Usmon joriy mavsumda La Liganing 18 o‘yinida 5 ta gol urdi va 5 ta golli uzatmani amalga oshirdi.
