So‘nggi xabarlarga ko‘ra, "Arsenal" yulduzi Bukayo Saka yangi bitimga imzo chekadi. Agar shunday bo‘lsa, 21 yoshli vinger haftasiga 300 ming funt ishlab topishni boshlaydi. Ta’kidlash joizki, Saka "Arsenal"ning joriy mavsumdagi chempionlik kurashida muhim figura bo‘lib turibdi. Klub akademiyasidan chiqqan bu futbolchi, 2022-23 yilgi APL bahslarida gol borasida ham, assist borasida ham 10 lik dovondan oshgan yagona vakildir. Shunga qaramay, Saka hali ham jamoasi bilan yangi shartnoma imzolamadi. Uning hozirgi bitimi 2020 yilda yangilangandi. O‘shanda Saka APLda faqat bitta gol urgan, Angliya termasi safida esa hali debyut qilmagandi. Vaqt o‘tishi bilan, Saka yuksaldi. Futbolchi ayni damda Mikel Arteta va Garet Sautgeyt jamoalarida o‘ta kerakli bo‘lib ulgurgan.
Bukayo Saka Yevro saralash bahslarida porlmoqda. Uning Ukraina terma jamoasiga qarshi ko‘rsatgan fenomenal o‘yini haqida Pol Merson shunday deydi: "Saka kuchsiz jamoalarga qarshi xet-trik qilmaydi. U 7-0 hisobida oxirgi golni ham urmaydi. "Arsenal"da uning vazifasi boshqacharoq. Saka birinchi, hisob tenglashtiruvchi yoki g‘alaba golini kiritadi. U o‘ta kerakli lahzalarda qulay uzatmalarni amalga oshirishni yaxshi ko‘radi. Aytishim mumkinki, Saka – muhim paytlar futbolchisi. Bunday turdagi o‘yinchilarni topish ancha murakkab ish. Ha, maydonda istagancha ajoyibotlar qila oladigan futbolchilar ko‘p. Ammo hal qiluvchi pallalarda bu ishni bajarish ko‘pchilikning qo‘lidan kelmaydi. Saka esa aynan shunday qiladi. Hatto, u bu ishni har hafta ham bajara oladi".
Angliya terma jamoasi yulduzining amaldagi bitimi 2024 yilda yakuniga yetishiga qaramay, "Arsenal" rahbariyati uni jamoada olib qolishga ishonmoqda. Ammo bunda bir muammo bor. Amaldagi bitimga ko‘ra, Saka, nisbatan kam maosh oladi. Uning haqqi tarkibdagi Eddi Nketia va Kiran Tirnilarnikidan ham kamroq. U APLning eng yaxshi maosh to‘lanadigan 100 ta o‘yinchisi ro‘yxatiga ham kirmaydi. Ammo bu tez orada o‘zgaradi. Saka yangi shartnomaga qo‘l qo‘yadi. Bu esa futbolchining hozirgi, haftalik 70 ming funt maoshini keskin oshiradi. Unga haftasiga 300 ming funt maosh taklif qilinadi. Bu hajm Sakani "Arsenal"ning eng yaxshi haq to‘lanadigan futbolchisiga aylantiradi. Aslini olganda, bu summa, Angliya bo‘ylab ham eng yaxshilaridan biridir. Masalan, 2021 yilda "Manchester Siti" sotib olgan Jek Grilish ham haftasiga 300 ming oladi.
Shunga qaramay, uch yuz mingdan ko‘p ishlaydigan yulduzlar ham bor. Ular APLda 8 tani tashkil etadi. Demak, quyida "Capalogy" portali tomonidan taqdim etilgan ro‘yxatni ko‘rishingiz mumkin.
1. Kevin De Bryuyne – 400 ming/hafta
2. Erling Xoland – 375 ming/hafta
3. David De Xea – 375 ming/hafta
4. Kazemiro – 350 ming / hafta
5. Muhammad Saloh – 350 ming/hafta
6. Jeydon Sancho – 350 ming/funt
7. Rafael Varan – 340 ming/hafta.
8. Raxim Sterling – 325 ming/hafta
ISMATOV J.
