"Chelsi" klubining bir qator o‘yinchilari mavsum oxirida jamoani tark etadi.

Ingliz klubi tarkibdagi yarim himoya juftligi Meyson Maunt va Mateo Kovachichga "Stemford Bridj"ni tark etishga ruxsat beradi. Klub yangi xaridlarni moliyalashtirish uchun mablag‘ yig‘ishga kirishdi.

Ma’lum qilinishicha, "ko‘klar" yangi klub egasi Todd Boeli qo‘l ostida yanvar oyida ulkan transfer xarajatlarini amalga oshirganidan keyin yangi o‘yinchilarni tarkibga jalb qilish uchun ba’zi o‘yinchilar jamoani tark etishiga to‘g‘ri keladi.

G‘arbiy London klubi shartnomasi 2024 yilda yakun topadigan ikki futbolchisining sotib yuborilishidan 100 mln funt ishlab olishni niyat qilgan.

Maunt klubdagi rolini aniq belgilovchi yangi bitim imzolanishini istagan. Biroq muzokaralar hech qanday samara bermadi. Bu Angliya terma jamoasi a’zosining Premyer-ligadagi raqobatchilardan biriga, jumladan, "Liverpul"ga o‘tishi ehtimolini oshirdi. Yurgen Klopp yangi mavsum oldidan yarim himoyani mustahkamlashni niyat qilgan.

"Chelsi" 2019 yilda "Real"dan 40 mln funtga xarid qilingan xorvatiyalik futbolchi Kovachichni sotib foyda qilishiga ishonadi. Yarim himoyachi "Chelsi"ga o‘tganidan buyon 200 dan ortiq o‘yinlarda maydonga tushdi. Biroq uning klub bilan hamkorligi shu yergacha ko‘rinadi.