Joriy mavsumda Qozog‘iston chempionatida ishtirok etayotgan "Humo" xokkey klubi ilk urinishdayoq pley-off bosqichi finaliga chiqqani haqida xabar berib o‘tgandik.

Jamoamiz bugun ham Qozog‘istonning "Nomad" klubiga qarshi dastlabki uchrashuvni o‘tkazdi. O‘yin astanaliklar uchun juda yaxshi boshlandi. Ular uchinchi daqiqadayoq hisobni ochishgan bo‘lsa, 15-daqiqaga kelib hisobni mustahkamlashdi — 0:2.

"Humo" ikkinchi bo‘lim o‘rtalariga kelib Denis Shurakovning goli evaziga hisobni bittaga qisqartirdi. Uchinchi taym o‘rtalarida esa "Nomad" maydonda bir kishi bo‘lib qoldi. Bundan esa xokkeychilarimiz unumli foydalanib, hisobni tenglashtirdi. Gol muallifi — Maksim Trunyov.

Asosiy vaqtda hisob teng bo‘lgani uchun over-taym belgilandi. Uchinchi 3-daqiqasida Timur Shingareev qarshi hujumga o‘tdi va raqib hududida ikki himoyachini chalg‘itgan holda ajoyib zarba bilan g‘alaba goli muallifiga aylandi — 3:2.

Shu tariqa, "Humo" finaldagi dastlabki g‘alabaga erishdi. Chempionlik seriyasi bir jamoa 4 g‘alaba erishgunga qadar davom etadi. Ikkinchi o‘yin ertaga 19:30da "Humo arena"da bo‘lib o‘tadi.

Xokkey. Qozog‘iston chempionati. Final, 1-o‘yin
"HUMO" - "ASTANA" - 3:2 OT (0:2, 1:0, 1:0, 1:0)
Gollar:
02:23. 0:1 — Alixan Omirbekov
14:18. 0:2 — Adil Beketayev
33:49. 1:2 — Denis Shurakov
53:28. 2:2 — Maksim Trunyov
62:28. 3:2 — Timur Shingareev