Kecha “Metallurg” PFK qarorgohida yig‘ilish bo‘lib o‘tdi. Klub rahbariyati jamoa o‘yinchilariga murabbiylar shtabidagi o‘zgarishlarni ma’lum qildi. Unga ko‘ra bugundan e’tiboran jamoa bosh murabbiy lavozimida chernogoriyalik Vesko Steshevich faoliyat yuritadi.

Vesko Steshevich tajribali mutaxassis. U 57 yoshda, 1965 yilning 18 dekabrida tug‘ilgan. Mazkur murabbiyning so‘nggi jamoasi Rossiya Federasiyasining “Arsenal” (Tula) klubidir. Unga qadar “Podgorisa”, “Dechich”, “OFK Grbal”, “ Mlalost”, “Al Faysali”, “Rostov”, “Dinamo” (Moskva), “Amkar” (Perm) jamoalarida faoliyat yuritgan. “Arsenal” da tajribali Miodrag Bojovich shtabida ishladi.

Steshevich o‘zi bilan “Metallurg” jamoasiga yordamchi sifatida Nenad Vukchevishni ham olib keldi. Nenad 48 yoshda, 1974 yilning 25-noyabr sanasida Chernogoriyaning Podgorisa shahrida tavallud topgan. Futbolchilik faoliyatida hujum chizig‘ida o‘ynagan. Sobiq Yugoslaviya, Gresiya, Shvesiya klublarida to‘p surgan. Futbolchilik faoliyatini tugatgach, murabbiylik sohasida tahsil oldi. UYEFA lisenziyasini qo‘lga kiritgach o‘zi tug‘ilib o‘sgan Chernogoriyaning “Spartak” (Subbotisa), “Petrovas”, “Podgorisa” jamoalarida ishladi.

"Biz har ikkala murabbiyga yangi lavozimlarida muvaffaqiyat yor bo‘lishini tilaymiz. “Metallurg” PFK bilan yangi cho‘qqilarni zabt eting. “Metallurg” PFKning ahil oilasiga xush kelibsiz, Nenad Vukchevich, Vesko Steshevich!" - deyilada bekobodliklarning rasmiy bayonotida.