"Manchester Yunayted" hujumchisi Markus Reshford "Brentford" ustidan qozonilgan 1:0 hisobidagi g‘alabadan so‘ng jurnalistlar bilan suhbatlashdi.
25 yoshli angliyalikning Premyer-liga uchrashuvining 27-daqiqasida urgan goli “qizil iblislar”ga 3 ochko keltirdi va turnir jadvalida to‘rtinchi o‘ringa qaytish imkonini berdi.
“Mavsumning hal qiluvchi pallasi keldi, har bir o‘yin katta ahamiyatga ega. G‘alabadan juda xursandmiz. Har bir o‘yinda o‘zimizning eng yaxshi fazilatlarimizni ko‘rsatishning iloji yo‘q, lekin biz rivojlanishda davom etishimiz va belgilangan me’yordan pastga tushmasligimiz kerak.
Maqsadimiz imkon qadar ko‘proq ochko to‘plash va kuchli 4-o‘rindan joy olish. Qolgan uchrashuvlarda muvaffaqiyat qozonish uchun hamma narsani qilishimiz kerak", - deya Reshford so‘zlarini keltiradi BBC.
