Yana ikki kundan so‘ng Jizzax viloyatining Zomin tumani markazidagi stadionda chernogoriyalik Vesko Steshevich «Metallurg» bosh murabbiyligidagi debyut uchrashuvini o‘tkazadi.

Superligada birinchi o‘yin oson kechmasligi aniq. Zero «Metallurg» singari «So‘g‘diyona» ham 2023 yilgi mavsumni ko‘ngildagidek boshlay olmadi. Qatorasiga uchta o‘yinni o‘z maydonida o‘tkazgan jizzaxliklar ikkita o‘yinni boy berdi, bitta uchrashuvda durang o‘ynadi. Keyin Namanganga safar 0:3 hisobidagi yirik mag‘lubiyat bilan intiho topdi.

«Metallurg» esa to‘rtta uchrashuvning 3 tasida maydonni bosh egib chiqib ketgan. Ligadagi eng yomon to‘plar nisbati ham «Metallurg»ga tegishli – 2:9. Jamoalar deyarli yonma yon pog‘onalarda borishmoqda. Shu ma’noda mazkur uchrashuvni 6 ochkolik qiymatga ega deyish mumkin. «Metallurg» bugungacha kuchlilar safida 724 ta o‘yin o‘tkazgan: 241 ta g‘alaba, 148 ta durang, 335 ta mag‘lubiyat. To‘plar nisbati: 871:1096.