Яна икки кундан сўнг Жиззах вилоятининг Зомин тумани марказидаги стадионда черногориялик Веско Стешевич «Металлург» бош мураббийлигидаги дебют учрашувини ўтказади.

Суперлигада биринчи ўйин осон кечмаслиги аниқ. Зеро «Металлург» сингари «Сўғдиёна» ҳам 2023 йилги мавсумни кўнгилдагидек бошлай олмади. Қаторасига учта ўйинни ўз майдонида ўтказган жиззахликлар иккита ўйинни бой берди, битта учрашувда дуранг ўйнади. Кейин Наманганга сафар 0:3 ҳисобидаги йирик мағлубият билан интиҳо топди.

«Металлург» эса тўртта учрашувнинг 3 тасида майдонни бош эгиб чиқиб кетган. Лигадаги энг ёмон тўплар нисбати ҳам «Металлург»га тегишли – 2:9. Жамоалар деярли ёнма ён поғоналарда боришмоқда. Шу маънода мазкур учрашувни 6 очколик қийматга эга дейиш мумкин. «Металлург» бугунгача кучлилар сафида 724 та ўйин ўтказган: 241 та ғалаба, 148 та дуранг, 335 та мағлубият. Тўплар нисбати: 871:1096.