"Manchester Siti" hujumchisi Erling Xoland mashg‘ulotlarga qaytdi. Bu haqda klub matbuot xizmati xabar berdi.

Eslatib o‘tamiz, norvegiyalik forvard sondagi muammolar tufayli terma jamoasiga mart oyidagi o‘yinlarda yordam bera olmadi. Shuningdek, 22 yoshli hujumchi APL doirasidagi “Liverpul”ga qarshi o‘yinda maydonga tushmadi, ammo usiz jamoa yirik hisobda g‘alaba qozongan – 4:1.

2022/2023 yilgi mavsumda Erling Xoland barcha musobaqalarda 37 ta o‘yinda maydonga tushdi. Ularda hujumchi 42 ta gol urdi va sheriklariga 5 ta golli uzatma berdi.

Angliya chempionatining navbatdagi uchrashuvini “Manchester Siti” 8 aprel kuni safarda “Sautgempton”ga qarshi o‘tkazadi.