Superliga 5-turi doirasida o‘z maydonida “Bunyodkor”ga imkoniyatni boy bergan “Buxoro” klubi bosh murabbiyi Ulug‘bek Baqoyev jamoadagi muammolar, rejalar, rahbariyat tomonidan belgilangan vazifalar va muxlislar ishonchi haqida gapirdi.
“Avvalo, aytishim kerakki jamoamiz ketma-ket mag‘lubiyatlardan keyin jismoniy va psixologik jihatdan qiyin ahvolda. O‘yin boshlanishi bilan futbolchilar ortiqcha hayajonlanishgandek. Kerak bo‘lmagan vaziyatda gol o‘tkazib yubordik. Vaziyatni o‘nglash uchun oldinga tashlandik, ammo buning uddasidan chiqa olmadik. O‘yin oxirida butun jamoa bo‘lib hujumga otlandik va ikkinchi golni qo‘yib yubordik. Bu gol hech nimani anglatmas edi.
Jamoa aytganimdek biroz psixologik tushkun vaziyatda. Chempionat avvalida yo‘qotilgan ochkolarni qaytarish uchun astoydil harakat qilamiz. Hali hammasi oldinda va vaziyatni o‘nglashga intilamiz.
Ikkinchi davragacha hali 8ta o‘yinimiz bor. Kim qanday holatda ekanini, jamoadagi futbolchilarning darajasini bilib olishimiz kerak. Shundan keyin transferlar borasida fikr bildirish mumkin.
Muxlislarga rahmat. Ular qiyin vaziyatda ham bizni qo‘llab-quvvatlab turishibdi. Ularga sabr va matonat tilayman. Biz ham ularga munosib javob qaytaramiz. Rejalarimiz ulkan va ularni amalga oshirish uchun mehnat qilamiz”, deydi murabbiy.
