Joriy mavsumda Qozog‘iston chempionatida ishtirok etayotgan "Humo" xokkey klubi finaldagi uchinchi uchrashuvini o‘tkazdi.

Jamoamiz bugun Astanada Qozog‘istonning "Nomad" klubiga bahs olib bordi. O‘yin har ikkala jamoa uchun og‘ir kechdi. Oldinga o‘tib shuni aytish kerakki, raqib posboni qahramonlik ko‘rsatib, juda qiyin vaziyatlarda jamoasini qutqardi. Aks holda "Humo" o‘yinni over-taymlargacha olib bormasdan, g‘alabani qo‘lga kiritgan bo‘lardi. O‘z navbatida bizning darvozabon Smiryagin ham bir nechta xvfli zarbalarni bartaraf etganini ta’kidlash lozim.

Toshkentliklar birinchi bo‘limda hisobni ochishgan bo‘lsa, "Nomad" ikkinchi taymda muvozanatni tikladi. Uchinchi bo‘limda esa hisob o‘zgarmadi va navbatda over-taymlarga berildi. Finaldagi seriyalarda "bulitlar"dan foydalanilmasligi sababli g‘olib faqat o‘yinda aniqlanadi. G‘olibni aniqlash uchun esa 3ta qo‘shimcha bo‘limlar kerak bo‘ldi. Ularning dastlabki ikkitasida shayba darvozalarga kirmadi. Uchinchi taymning 6-daqiqasida esa "Nomad" xokkeychisi Muratov tomonidan yo‘llangan zarba natijasida shayba rekoshet orqali darvozaga kirib ketdi.

Shu tariqa, "Nomad" finaldagi seriyada 2:1 hisobida oldinga o‘tib oldi. Jamoalar o‘rtasidagi to‘rtinchi o‘yin ertaga Astanada o‘tkaziladi.

Xokkey. Qozog‘iston chempionati. Final, 3-o‘yin
«Nomad» - «Humo» - 2:1 OT (0:1, 1:0, 0:0, 0:0, 0:0, 1:0).
Gollar:
0:1 — Kravchenko, 16.17.
1:1 — Boyko (Kayirjan), 22.02.
2:1 — Muratov (Daniyar), 105.59.