Жорий мавсумда Қозоғистон чемпионатида иштирок этаётган "Ҳумо" хоккей клуби финалдаги учинчи учрашувини ўтказди.

Жамоамиз бугун Астанада Қозоғистоннинг "Номад" клубига баҳс олиб борди. Ўйин ҳар иккала жамоа учун оғир кечди. Олдинга ўтиб шуни айтиш керакки, рақиб посбони қаҳрамонлик кўрсатиб, жуда қийин вазиятларда жамоасини қутқарди. Акс ҳолда "Ҳумо" ўйинни овер-таймларгача олиб бормасдан, ғалабани қўлга киритган бўларди. Ўз навбатида бизнинг дарвозабон Смирягин ҳам бир нечта хвфли зарбаларни бартараф этганини таъкидлаш лозим.

Тошкентликлар биринчи бўлимда ҳисобни очишган бўлса, "Номад" иккинчи таймда мувозанатни тиклади. Учинчи бўлимда эса ҳисоб ўзгармади ва навбатда овер-таймларга берилди. Финалдаги серияларда "булитлар"дан фойдаланилмаслиги сабабли ғолиб фақат ўйинда аниқланади. Ғолибни аниқлаш учун эса 3та қўшимча бўлимлар керак бўлди. Уларнинг дастлабки иккитасида шайба дарвозаларга кирмади. Учинчи таймнинг 6-дақиқасида эса "Номад" хоккейчиси Муратов томонидан йўлланган зарба натижасида шайба рекошет орқали дарвозага кириб кетди.

Шу тариқа, "Номад" финалдаги серияда 2:1 ҳисобида олдинга ўтиб олди. Жамоалар ўртасидаги тўртинчи ўйин эртага Астанада ўтказилади.

Хоккей. Қозоғистон чемпионати. Финал, 3-ўйин
«Номад» - «Ҳумо» - 2:1 ОТ (0:1, 1:0, 0:0, 0:0, 0:0, 1:0).
Голлар:
0:1 — Кравченко, 16.17.
1:1 — Бойко (Кайиржан), 22.02.
2:1 — Муратов (Данияр), 105.59.