"Bavariya" bosh murabbiyi Tomas Tuxel "Manchester Siti"ga qarshi bo‘lib o‘tadigan Chempionlar ligasi bahsi haqida o‘z fikrlari bilan o‘rtoqlashdi.

Seshanba kuni myunxenliklar ikki o‘yindan iborat chorak finalning birinchi uchrashuvini o‘tkazadi. Uchrashuv ingliz grandi maydonida bo‘lib o‘tadi.

“Biz jasur bo‘lishimiz va o‘zimizga ishonishimiz kerak. Muvaffaqiyatga erishish uchun zukkolik va taktik moslashuvchanlik kerak bo‘ladi. So‘nggi haftalarda "Siti" juda yaxshi harakat qilmoqda. Umid qilamanki, barcha futbolchilarimiz yaxshi dam olishdi va formada bo‘lishadi.

Chempionlar ligasida hamma narsani jamoaning o‘yin vaqtidagi formasi hal qiladi. Seshanba kuni hamma narsa sodir bo‘lishi mumkin, bu futbol. Biz raqibning kuchliligini bilamiz, bizni eng qiyin sinovlardan biri kutib turibdi", - dedi Tuxel.