Ayollar futboli bo‘yicha Parij-2024 Olimpiya o‘yinlarining Osiyo mintaqasi saralash bosqichi 3-turida O‘zbekiston terma jamoasi Iordaniyaga qarshi bahs olib bordi.

Unda jamoamiz raqib 7:0 hisobida tor-mor keltirdi. Diyora Habibullayeva "xet-trik" qayd etgan bo‘lsa, Nilufar Qudratova "dubl"ga erishdi.

Shu tariqa, O‘zbekiston ayollar terma jamoasi 9 ochko bilan saralashning keyingi bosqichiga yo‘l oldi. Bu bosqichda 12 jamoa qur’a yordamida 3 guruhga bo‘linadi. Guruh g‘oliblari va 2-o‘rinni egallagan jamoalari o‘rtasida eng yaxshi ko‘rsatkichga ega bo‘lgan bitta terma jamoa 3-bosqich yo‘llanmasini qo‘lga kiritadi. Eng so‘nggi bosqichda qur’a yordamida ikkita juftlik aniqlanadi. Uy-safar tizimida o‘tadigan o‘yinlardan so‘ng Parij-2024 yo‘llanmasini qo‘lga kiritgan ikki jamoa nomi aniq bo‘ladi.

Parij-2024 Osiyo mintaqasi, "A" guruhi, 3-tur bahsi
O‘zbekiston - Iordaniya - 7:0
Gollar: Umida Zoirova (9ʼ), Ilvina Ablyakimova (17ʼ), Diyora Habibullayeva (44ʼ, 49ʼ, 63ʼ), Nilufar Qudratova (56ʼ, 58ʼ).