"Monako" hujumchisi va sardori Vissam Ben Yedder soliq to‘lashdan bo‘yin tovlagani uchun olti oylik shartli qamoq jazosiga hukm qilindi, deb xabar beradi AS.
Manbaga ko‘ra, hujumchi 2017 yilda Ispaniyaning "Sevilya" jamoasida o‘ynab, soliq to‘lashdan bo‘yin tovlagan.
32 yoshli fransuz ilgari sudlanmaganligi sababli bu jazoni o‘tamaydi. U keyingi ikki yil ichida jinoyatni takrorlasa, haqiqiy muddatga ega bo‘lishi mumkin. Shuningdek, hujumchi 133 ming yevro jarima to‘lashi kerak bo‘ladi.
2022/23 yilgi mavsumda Ben Yedder "Monako" safida barcha musobaqalarda 37 ta o‘yinda maydonga tushib, 23 ta gol urdi va 5 ta golli uzatmani amalga oshirdi.
