Belgiyalik tajribali yarim himoyachi Aksel Vitsel Madridning «Atletiko» klubida qoladi.

Todofichajesning so‘zlariga ko‘ra, «matraschilar» 34 yoshli futbolchini keyingi mavsumda ham jamoada qoldirishga qaror qilishgan.

Shu tariqa, Aksel shartnomasini to‘liq o‘taydi va shundan so‘ng u erkin agent sifatida klubdan ketishi mumkin.

Vitsel o‘tgan yilning iyul oyidan beri Madrid jamoasi sharafini himoya qilib kelmoqda. Uning transfer narxi besh million yevroga baholanmoqda.

Ispaniya chempionatining bu galgi mavsumida Aksel 24 ta bahs o‘tkazib, gol ura olmagan. Ayni vaqtda belgiyalik futbolchi ikkita sariq kartochka oldi.