"Manchester Yunayted" Yevropa ligasining yarim finaliga chiqish uchun oldin hech qachon qilmagan ishini bajarishi lozim – "Sevilya"ni mag‘lub etish. Yevrokuboklar doirasida "qizil iblislar" so‘nggi 4 ta o‘yinda 2 ta durang, 2 ta mag‘lubiyat qayd etgan. Qolaversa, "MYU"ning ispan jamoalariga qarshi natijalari unchalik ham yaxshi emas. Marsel Zabitserning goli bu qora an’anaga yakun yasashi kerak edi. Ammo bunday bo‘lmadi. "Old Trafford"dagi o‘yin durang bilan yakunlandi. Malasiya va Maguayrning avto gollari hamma masalani "Ramon Sanches Pisxuan" stadioni qoldirgandi. "Sevilya" YELda dahshatli ko‘rsatkichlarga ega. Bu jamoa turnir sovrinini olti marta qo‘lga kiritgan. Shuningdek, Andalusiya klubi o‘z maydonidagi so‘nggi 26 ta o‘yinning 23 tasini g‘alaba bilan yakunlagan. Xose Luis Mendilibar esa "Sevilya"ni Yevropa ligasida boshqarayotgan 7 murabbiy bo‘lib turibdi. Qolgan 6 tasining beshtasi uy uchrashuvlarida faqat g‘alabalar qayd etgan. Shunday paytda, "MYU" o‘zining safardagi muvaffaqiyatli seriyasiga ishonishi mumkin. Xususan, "qizil iblislar" yevrokuboklardagi so‘nggi 13 ta safar o‘yinlarining faqat bittasida mag‘lub bo‘lgan xolos. Bu mag‘lubiyat 2021 yilning mayida, "Roma"ga qarshi qayd etilgandi (3-2).
Ushbu juftlik g‘olibi yarim finalda "Yuventus" yoki "Sporting" bilan to‘qnash keladi.
Jamoalar sport formasi haqida
Avvalo, mezbon jamoa haqida. "Sevilya" o‘z tarixidagi eng omadsiz mavsumlaridan birini o‘tkazmoqda. Bu jamoa La-ligada 9 ta g‘alaba, 8 ta durang va 12 ta mag‘lubiyat qayd etgan. Oqibatda, klub xavfli zona atrofida turibdi. Ammo so‘nggi turdagi "Valensiya"ga qarshi muhim g‘alaba, jamoaning jadvaldagi pozisiyasini yaxshilagan. Shuni ham ta’kidlash kerakki, "Sevilya"ning ko‘plab mag‘lubiyatlari, bu mavsumda, asosan mehmonda qayd etilmoqda. Ya’ni, uydagi o‘yinlarda jamoa yaxshi harakat qiladi.
"Manchester Yunayted"da bu borada hammasi joyida. Klub APLning so‘nggi turida "Nottingem"ni safarda mag‘lub etgandi. "MYU" aprel davomida faqat "Nyukasl"ga qarshi, safarda mag‘lubiyat alamini totib ko‘rishga majbur bo‘lgan. Erik ten Xag "Liverpul"ga 7-0 hisobida mag‘lub bo‘lganidan beri 6 ta o‘yinda g‘alaba, 2 ta o‘yinda esa durang qayd etdi.
Jarohatlanganlar haqida
"Sevilya"da himoyachi Gonsalo Montiyel YELda ketma-ket 3 ta sariq kartochka olgani sabab bugungi bahsni o‘tkazib yuboradi. Jamoaning yana bir qanot himoyachisi Aleks Telles "MYU"dan ijaraga olinganiga qaramay, bahsda ishtirok etishi mumkin.
Erik ten Xag jamoasida katta yo‘qotish mavjud. Jamoa sardori Brunu Fernandesh uchta sariq olgani uchun disfalifikasiyaga duchor bo‘ldi.
Markus Reshford jarohatidan tuzalishni davom ettirmoqda. Shu sabab u ham tarkibga kiritilmaydi. Birinchi o‘yinning qahramonlaridan biri bo‘lgan Zabitser jarohat olgani uchun "Nottingem"ga qarshi uchrashuvda qatnashmagandi. Uning "Sevilya" bahsida maydonga tushishi so‘roq ostida qolmoqda. Ularga qo‘shimcha ravishda Erik ten Xag jamoasida Alexandro Garnacho, Donni van de Bek, Lisandro Martines va Rafael Varanlar uzoq vaqtga safdan chiqqan. Shuningdek, Lyuk Shou oyoqlarining payini cho‘zilgani uchun o‘yinga tayyor bo‘lmasligi mumkin.
Kimlar porlaydi?
"Sevilya"nimg eng yorqin yulduzi jamoaning asosi bo‘lgan Ivan Rakitichdir. Ammo Yussuf En-Neseri va Xesus Navaslar ham birinchi o‘yinda o‘zini ko‘rsata olgan edi.
"MYU" Brunu Fernandesh va Marsel Zabitsersiz ancha qiynaladi. Ammo maydon markazidagi Kazemiro hammasini hal qilishi mumkin. Aynan u, bugungi bahsda jamoani qutqarishi aytilgan. Unga hamroh ravishda Kristian Eriksen harakat qiladi. Oldingi chiziqda esa o‘z formasini tiklab olgan Antoni yana gol urishga urinib ko‘radi.
ISMATOV J.
