"Манчестер Юнайтед" Европа лигасининг ярим финалига чиқиш учун олдин ҳеч қачон қилмаган ишини бажариши лозим – "Севилья"ни мағлуб этиш. Еврокубоклар доирасида "қизил иблислар" сўнгги 4 та ўйинда 2 та дуранг, 2 та мағлубият қайд этган. Қолаверса, "МЮ"нинг испан жамоаларига қарши натижалари унчалик ҳам яхши эмас. Марсель Забитцернинг голи бу қора анъанага якун ясаши керак эди. Аммо бундай бўлмади. "Олд Траффорд"даги ўйин дуранг билан якунланди. Маласия ва Магуайрнинг авто голлари ҳамма масалани "Рамон Санчес Писхуан" стадиони қолдирганди. "Севилья" ЕЛда даҳшатли кўрсаткичларга эга. Бу жамоа турнир совринини олти марта қўлга киритган. Шунингдек, Андалусия клуби ўз майдонидаги сўнгги 26 та ўйиннинг 23 тасини ғалаба билан якунлаган. Хосе Луис Мендилибар эса "Севилья"ни Европа лигасида бошқараётган 7 мураббий бўлиб турибди. Қолган 6 тасининг бештаси уй учрашувларида фақат ғалабалар қайд этган. Шундай пайтда, "МЮ" ўзининг сафардаги муваффақиятли сериясига ишониши мумкин. Хусусан, "қизил иблислар" еврокубоклардаги сўнгги 13 та сафар ўйинларининг фақат биттасида мағлуб бўлган холос. Бу мағлубият 2021 йилнинг майида, "Рома"га қарши қайд этилганди (3-2).
Ушбу жуфтлик ғолиби ярим финалда "Ювентус" ёки "Спортинг" билан тўқнаш келади.
Жамоалар спорт формаси ҳақида
Аввало, мезбон жамоа ҳақида. "Севилья" ўз тарихидаги энг омадсиз мавсумларидан бирини ўтказмоқда. Бу жамоа Ла-лигада 9 та ғалаба, 8 та дуранг ва 12 та мағлубият қайд этган. Оқибатда, клуб хавфли зона атрофида турибди. Аммо сўнгги турдаги "Валенсия"га қарши муҳим ғалаба, жамоанинг жадвалдаги позициясини яхшилаган. Шуни ҳам таъкидлаш керакки, "Севилья"нинг кўплаб мағлубиятлари, бу мавсумда, асосан меҳмонда қайд этилмоқда. Яъни, уйдаги ўйинларда жамоа яхши ҳаракат қилади.
"Манчестер Юнайтед"да бу борада ҳаммаси жойида. Клуб АПЛнинг сўнгги турида "Ноттингем"ни сафарда мағлуб этганди. "МЮ" апрел давомида фақат "Ньюкасл"га қарши, сафарда мағлубият аламини тотиб кўришга мажбур бўлган. Эрик тен Хаг "Ливерпул"га 7-0 ҳисобида мағлуб бўлганидан бери 6 та ўйинда ғалаба, 2 та ўйинда эса дуранг қайд этди.
Жароҳатланганлар ҳақида
"Севилья"да ҳимоячи Гонсало Монтиель ЕЛда кетма-кет 3 та сариқ карточка олгани сабаб бугунги баҳсни ўтказиб юборади. Жамоанинг яна бир қанот ҳимоячиси Алекс Теллес "МЮ"дан ижарага олинганига қарамай, баҳсда иштирок этиши мумкин.
Эрик тен Хаг жамоасида катта йўқотиш мавжуд. Жамоа сардори Бруну Фернандеш учта сариқ олгани учун дисфалификацияга дучор бўлди.
Маркус Рэшфорд жароҳатидан тузалишни давом эттирмоқда. Шу сабаб у ҳам таркибга киритилмайди. Биринчи ўйиннинг қаҳрамонларидан бири бўлган Забитцер жароҳат олгани учун "Ноттингем"га қарши учрашувда қатнашмаганди. Унинг "Севилья" баҳсида майдонга тушиши сўроқ остида қолмоқда. Уларга қўшимча равишда Эрик тен Хаг жамоасида Алехандро Гарначо, Донни ван де Бек, Лисандро Мартинес ва Рафаэль Варанлар узоқ вақтга сафдан чиққан. Шунингдек, Люк Шоу оёқларининг пайини чўзилгани учун ўйинга тайёр бўлмаслиги мумкин.
Кимлар порлайди?
"Севилья"нимг энг ёрқин юлдузи жамоанинг асоси бўлган Иван Ракитичдир. Аммо Юссуф Эн-Несери ва Хесус Наваслар ҳам биринчи ўйинда ўзини кўрсата олган эди.
"МЮ" Бруну Фернандеш ва Марсель Забитцерсиз анча қийналади. Аммо майдон марказидаги Каземиро ҳаммасини ҳал қилиши мумкин. Айнан у, бугунги баҳсда жамоани қутқариши айтилган. Унга ҳамроҳ равишда Кристиан Эриксен ҳаракат қилади. Олдинги чизиқда эса ўз формасини тиклаб олган Антони яна гол уришга уриниб кўради.
ИСМАТОВ Ж.
