Superliga 6-tur bahslari doirasida Farg‘onada bo‘lib o‘tgan “Neftchi”- “Turon” uchrashuvida tomonlar 1-1 hisobidagi durangga imzo chekishganidan yaxshi xabardorsiz.
Biz mazkur bellashuv yakunlangach uchrashuvning eng yaxshi futbolchisi deb topilgan asli namanganlik bo‘lgan 25 yoshli “Turon” yarim himoyaichisi Bilolxo‘ja Toshmirzayevning fikrlariga quloq tutdik.
- Bugun jamoangiz Superliga peshqadamiga qarshi munosib o‘yin o‘tkaza oldi. Jamoangiz qayd etgan natijadan mamnun bo‘lsangiz kerak?
Albatta. Bugungi uchrashuv shiddatli o‘tishi oldindan malum edi. “Neftchi” Superligada peshqadamlik qilmoqda, biz esa muvafaqqiyatsiz o‘yinlarga barxam berishimiz kerak edi. Mavsumni omadsiz boshlaganimiz bois hozirda jamoani elitada olib qolish uchun harakat qilyapmiz. O‘yin agressiv kechishi kutilayotgandi va amalda ham shunday bo‘ldi. Bugungi raqibimiz O‘zbekistonning ko‘zga ko‘ringan futbolchilarini o‘zida jamlagan hamda yaxshi shakllangan jamoa edi. Bizga bu o‘yinda muxlislar daldasi nixoyatda muhim edi. Shukrki, ularning qo‘llab-quvvatlashi natijasida ijobiy natijaga erishdik.
- Garchi, natijalar ko‘ngildagidek kechmayotgan bo‘lsada jamoa o‘yin borasida yomon taassurot qoldirmayotgan edi. Bosh murabbiy Baxtiyor Ashurmatovning iste’fosi borasida qanday fikrdasiz?
Baxtiyor Ashurmatov jamoaga yaxshi ijrochilarni olib kelish asnosida kurashuvchan jamoani shakllantirayotgan edi. Ortda qolgan uchrashuvlarda bizga shunchaki omad yetishmadi. Boz ustiga mavsum startida “Buxoro” ga yutqazib qo‘yishimiz natijasida jamoada ruxiy tushkunlik ro‘y berdi. O‘ylashimcha, g‘alaba qozona olmayotganimiz sababli raxbariyat bosh murabbiyni o‘zgartirishga qaror qildi.
- Jamoani hozirda Superligada olib qolishga harakat qilyapmiz dedingiz. Aslida mavsum avvalidagi vazifa qanday edi?
Ochig‘ini aytsam, raxbariyat yuqori maqsadlar yo‘lida keng ko‘lamli isloxotlarni amalga oshirmoqda. Nasib qilsa bu yilgi mavsumni yaxshi o‘rinlarda yakunlab olsak kelgusi yildan chempionlik uchun kurashuvchi jamoa shakllantirilishi ko‘zda tutilgan.