“Manchester Yunayted”ning portugaliyalik yarim himoyachisi Brunu Fernandesh 23 aprel, yakshanba kuni Angliya kubogi doirasida “Manchester Yunayted” penaltilar seriyasida g‘alaba qozongan “Brayton”ga qarshi o‘yinda jarohat oldi.
Portugaliyalik birinchi bo‘limda og‘riqlik zarba oldi, biroq maydonda qoldi va o‘yinning qo‘shimcha bo‘limining 101-daqiqasida u almashtirildi. Fernandesh o‘rniga Marsel Zabitser o‘yinga tushdi.
Yarim himoyachi final hushtagi chalinganidan so‘ng yaxshi kayfiyatda edi, chunki Erik ten Xag jamoasi turnir finaliga yo‘llanma oldi, ammo MUTV eksperti Denni Uebberning fikricha, jarohat jiddiyroq bo‘lishi mumkin.
Fernandesh jamoaning ushbu haftadagi barcha mashg‘ulotlarini va 27 aprelga belgilangan "Tottenxem" bilan Angliya Premyer-ligasining 33-tur uchrashuvini o‘tkazib yuborish xavfi bor. Joriy mavsumda portugaliyalik futbolchi APLda 29 ta o‘yin o‘tkazib, 5 ta gol urishga erishdi.
