Sportdagi adolat prinsipi haqida davom etamiz.

Klublarni sun’iy ravishda kuchaytirib yuborish hamda bir shaxs qo‘l ostida turli klublarning to‘planishi aslida qoidalarga zid. O‘tgan yil noyabr oyida Gleyzerlar «Manchester Yunayted»ni sotishga qaror qildi. Bu yo‘lda esa asosiy favorit Qatar guruhi bo‘lib chiqdi. Ushbu guruh alohida kompaniyalar orqali «PSJ»ga ham egalik qilishini eslatib o‘tamiz.

Angliya hamda Italiyada bir mamlakatning ikkita klubiga egalik qilish taqiqlanadi. Xususan, Italiya futbol federasiyasi 2021 yili A Ceriyaga yo‘l olgan «Salernita» egasi Klaudio Lotitoga qat’iy taqiq qo‘ydi. Bunga sabab Rimning «Lasio» klubi ham ushbu shaxsga tegishli bo‘lgan. Natijada undan o‘z aksiyalarini sotish talab qilindi. Mamlakat futbol federasiyasi prezidenti Gabriyele Gavrina 2024-25 yilgi mavsum so‘ngigacha bu kabi ishlarning hal bo‘lishini nazorat qilib boradi. Shuni unutmaslik kerakki, ushbu qoida turli mamlakatlarning jamoalari uchun amal qilmaydi. Angliyada 15 ta klub «ko‘p jamoali» tizim uchun ro‘yxatga olingan. Bu esa Yevropadagi rekorddir. Ularning eng kattasi barchaga ma’lum «City Football Group» hisoblanadi. U o‘z miqyosini Angliyadan tashqari AQSH, Xitoy, Ispaniya, Avstraliya, Yaponiya, Urugvay, Belgiya, Hindiston hamda Boliviya kabi davlatlar orqali kengaytirgan. Shunga o‘xshash ravishda «Red Bull» tizimida Avstriya, Germaniya, AQSH va Braziliyadagi klublar mavjud. Angliyada ikkinchi klubga egalik qilish jarayonida undagi aksiyalar 30%ulushdan oshib ketmasligi kerak. Buni nazoratga soluvchi maxsus test mavjud.

UYEFA miqyosidagi turnirlarda teng ulushdagi aksiyalarga ega ikki xil jamoa ishtirok etishi mumkin emas. Bu qoida 1998 yili joriy etilgan bo‘lib, o‘sha yili UYEFA kubogida qatnashgan «AYEK» hamda «Slaviya»da bu ustavning buzilish holatlari kuzatilgan. UYEFAning qoidalari ichki ligalarnikidan farq qilishi haqida aytib o‘tdik. Avvallari bu tashkilot «ikkitalik klub» tizimiga umuman ruxsat bermagan. Keyinchalik o‘zgarishlar bo‘ldi va endi biror kompaniya 49% ulushga egalik qilishi mumkin.