O‘zbekistonlik futbol murabbiyi Viktor Jalilov 7 may kuni 71 yoshida vafot etdi. Bu haqda PFL matbuot xizmati ma’lum qildi.

Jalilov uzoq yillar davomida Toshkentning “Paxtakor” klubida bosh murabbiy va direktor lavozimlarida faoliyat yuritgan.

Mutaxassis “Paxtakor” va “Navbahor” bilan 1996 va 2002 yillarda O‘zbekiston chempionati g‘olibligini qo‘lga kiritgan. Shuningdek, to‘rt marta mamlakat kubogiga ega chiqqan (1995, 1997, 2001/02, 2009). Jalilov uch marta (1996, 2002, 2005) O‘zbekistonda yilning eng yaxshi murabbiyi deb topilgan.

Murabbiy shuningdek, “Politotdel” (“Do‘stlik”), “Navbahor”, “Mash’al”, “Dinamo Samarqand” klublari va O‘zbekiston U-22 terma jamoasida ham faoliyat olib borgan.