Ispaniya La Ligasi 33-turidan o‘rin olgan «Real Sosyedad» - «Real» o‘yinida hisobni ochgan yaponiyalik hujumchi Takefusa Kubo avvaliga golni nishonlamaydigandek ko‘rindi.
Lekin atigi 2 soniyalik sukutdan so‘ng maydonda «tizza bilan suzish» sahnasini namoyish etdi. Futbolda o‘yinchilarning sobiq jamoalari darvozasiga urgan gollarini nishonlamasliklari ko‘p kuzatiladi. Lekin bunaqasi...
Kubo Yevropadagi faoliyatini aynan «Real»da boshlagani eslatish kerak. 2019 yili «Tokio» klubidan Ispaniya grandiga yo‘l olgan Yaponiya milliy jamoasi vakili «Madrid»ning atigi 4ta rasmiy o‘yinida maydonga tushdi, qolgan vaqt ijara safarlaridan bo‘shamadi. E’tiborli tomoni, yaponiyalik «Real Sosyedad» safiga to‘laqonli transfer orqali qo‘shilganiga qaramay, poytaxt grandi uning 50 foiz huquqini o‘zida saqlab qoldi. Odatda bunday holatda futbolchi sobiq jamoasi darvozasiga urgan golini nishonlamaydi. Kubo ham Tibo Kurtuani ojiz qoldirgach, avvaliga bir zum sukut saqladi. Biroq 21 yoshli futbolchi atigi 2 soniya ichida fikrini o‘zgartirib, maydonda tizzasi bilan sirg‘anishdan o‘zi-ni tiyolmadi.
Kuboning golni nishonlash sahnasi tabiiyki, ijtimoiy tarmoqlarda kuchli reaksiya keltirib chiqardi:
- Kuboni avvaliga golni nishonlamaslikka qaror qilgani va 1-2 soniyada fikrini o‘zgartirgani juda yoqdi.
- Bu - «Real»ning La Ligadagi umidi uchun bir daqiqalik sukut...
- Kubo sobiq klubiga hurmat saqlashni xohladi, lekin «tizzada suzish» imkoniyati oldida ojiz qoldi.
O‘yindan keyingi matbuot anjumanida esa «Real» bosh murabbiyi Karlo Anchelottiga Kuboni ortga qaytarish varianti xususida savol berildi va italiyalik mutaxassis bunga oddiy javob qaytardi: «Bu masalani ko‘rib chiqyapmiz, chunki Kubo juda zo‘r o‘ynayapti. Lekin shoshilmaslik kerak, barchasi haqida bir necha oydan keyin obdon gaplashamiz. Zero, tarkibda futbolchilar ko‘p va har biriga o‘yin vaqti taqdim etish juda qiyin».
