Toshkentda o‘tayotgan boks bo‘yicha jahon chempionatining yarim final bellashuvlariga start berildi. Hozirgina 54 kg vazndagi sportchilar o‘rtasida final yo‘llanmasi uchun janglar o‘tkazildi.

Ushbu vazndagi vakilimiz Oybek Jo‘rayev rossiyalik Dmitriy Dvaliga qarshi ringga ko‘tarildi. Dastlabki raundda hamyurtimiz qo‘llarining uzunligidan foydalanib, bo‘limni o‘z foydasiga hal qildi.

Rossiyalik charm qo‘lqop ustasi ikkinchi taymda faollikni oshirdi va yaqin masofaga kirib, Oybekni qiyin holatga tushirib qo‘ya oldi.

Jo‘rayev uchinchi bo‘limda raqibning faolligiga qarshilik ko‘rsata oldi va ko‘proq zarba yo‘lladi. Ochkolardagi farq juda qisqa bo‘lgani uchun qo‘shimcha ikki referining ovozlari ham inobatga olindi va Oybek 5:2 hisobida g‘alaba qozondi.

Hamyurtimiz finalda qozog‘istonlik Mahmud Sabirxanga qarshi ringga ko‘tariladi.