Toshkentda o‘tayotgan boks bo‘yicha jahon chempionatining yarim final bellashuvlari davom ettirilmoqda. Hozirgina 67 kg vazndagi vakilimiz Asadxo‘ja Mo‘ydinxo‘jayev final yo‘llanmasi uchun mo‘g‘ulistonlik Misheelt Battumurga qarshi jang qildi.

Asadxo‘ja qo‘llarining uzunligidan foydalanishga intilgan bo‘lsa, raqib bokschisi birinchi bo‘limda masofani qisqartirgan holda tezkor zarbalar berishga harakat qildi. Misheelt ayrim vaziyatlarda o‘z maqsadiga erishdi ham, ammo birinchi raundda kichik ustunlik hamyurtimiz tomonida bo‘ldi.

O‘zbekistonlik bokschi ikkinchi va uichnchi raundlarda raqib shashtini pasaytirishga erishdi. O‘zi esa yetarlicha ochkolar ishlab, o‘z ustunligini qayd etib qo‘ydi. Yakuniy baholar — 5:0 (30:27, 30:27, 29:28, 30:27, 30:27).

Mo‘ydinxo‘jayev finalda qozog‘istonlik Dulat Bekbauovga qarshi ringga ko‘tariladi.

Shu tariqa, O‘zbekiston terma jamoasining uchinchi bokschisi final yo‘llanmasini qo‘lga kiritdi.