Toshkentda bo‘lib o‘tayotgan boks bo‘yicha jahon chempionatida yarim finalning kechki dasturidan o‘rin olgan janglar deyarli yakunlanib qoldi.

71 kg. vazndagi vakilimiz Saidjamshid Ja’farov final yo‘llanmasi uchun braziliyalik Vanderson De-Oliveyraga qarshi jang o‘tkazdi. Sportchilar tavakkal qilmasdan ehtiyotkorlik bilan ringda harakat qilishdi. Birinchi bo‘limda hamyurtimiz kichik ustunlikka erishdi — 3:2.

Ja’farov ikkinchi raunddan boshlab zarbalar sonini oshirib bordi va jangni o‘z foydasiga hal etdi — 4:1 (30:27, 29:28, 29:28, 29:28, 28:29).

Shu tariqa, O‘zbekiston terma jamoasining yetti a’zosi jahon chempionati finalida jang qiladigan bo‘ldi. Bu esa boksimiz tarixidagi eng yaxshi natija hisoblanadi. Gamburg-2017 va Yekaterinburg-2021 turnirlarida O‘zbekistonning 4 bokschisi finalda qatnashgandi.