Toshkentda o‘tkazilayotgan boks bo‘yicha erkaklar o‘rtasidagi jahon chempionatida birinchi kundan o‘rin olgan final janglari yakuniga yetib bormoqda. Hozirgina 51 kg vaznda ringga ko‘tarilgan Hasanboy Do‘smatov ajoyib g‘alabani qo‘lga kiritdi.
Fransiyalik raqib Bilol Bennama bo‘y va qo‘llarining uzunligi jihatdan ancha ustunlikka ega edi. Ammo bu ustunligidan foydalanishga shoshilmadi. Birinchi bo‘lim tugashiga bir daqiqadan kamroq vaqt qolganida Bilol hujum tashkil qilishga urindiyu, Hasanboyning o‘ng va chap qo‘ldan yo‘llangan zarbalarini yuzidan qabul qilib oldi. Natijada u ringga quladi.
Ayol referi nokdaun qayd etib, sakkizgacha sanashni boshlagandi, Bennama o‘rnidan turib chayqalib yura boshladi. Buni ko‘rgan referi jangni to‘xtatib qo‘ya qoldi. Nokaut!
Shu tariqa, 30 yoshli Hasanboy Do‘smatov faoliyati davomida ilk marta jahon chempioniga aylandi. Bungacha uning hisobida Rio-2016 chempionligi va Gamburg-2017 jahon chempionatining kumush medali bor edi. Bundan tashqari, Do‘smatov 3 karra Osiyo chempioni hisoblanadi.