Superliganing 11-turidan o‘rin olgan “Olimpik” – “Neftchi” (0:0) uchrashuvidan so‘ng mezbonlar bosh murabbiyi Timur Kapadze o‘z fikrlarini bildirib o‘tdi.
“Neftchi”ga qarshi o‘yin oson bo‘lmasligini bilar edik va shunga yarasha tayyorgarlik ko‘rdik. Birinchi bo‘limda havo biroz issiq edi va temp ham u qadar yuqori bo‘lmadi. Ikkinchi taym esa qiziqarli o‘tdi. Durang adolatli bo‘ldi. Boisi, har ikkala jamoada ham qulay imkoniyatlar bo‘ldi. Bugungi bahs birinchi golgacha edi.
Rotasiya ishlarini amalga oshiryapmiz. Ayniqsa, hujum chizig‘ida. Sababi, hujumchilarga savollarim ko‘p. Shu sabab hujum va markazda rotasiya qilyapmiz. O‘tgan yili tarkibda raqobat kuchli edi. Bu mavsum yangi yoshlarni jalb etdik va ular ham o‘ziga yarasha tajriba orttirishdi. O‘ylaymanki, bugun zaxiradan maydonga tushgan futbolchilar ham yaxshi harakat qilishdi”, – dedi Kapadze.
