Dortmundning "Borussiya" klubi markaziy himoyachi Mats Xummels bilan shartnomani uzaytirishga juda yaqin turibdi. Jurnalist Fabrisio Romanoning so‘zlariga ko‘ra, kelishuv hali yakunlangani yo‘q, biroq jarayon yakuniy bosqichda.
Manba bergan xabarga ko‘ra, Dortmundning "Borussiya" klubi rahbariyati Xummels yaqin kunlarda barcha kerakli hujjatlarni imzolashiga umid qilmoqda. Eslatib o‘tamiz, Matsning Edin Terzich jamoasi bilan amaldagi shartnomasi mavsum oxirida yakuniga yetadi.
34 yoshli Xummels Germaniya chempionatining ushbu mavsumida 29 ta o‘yin o‘tkazib, bitta gol urgan. "Borussiya Dortmund" Bundesliganing so‘nggi turi oldidan "Bavariya"dan ikki ochko farqi bilan peshqadamlik qilmoqda.
