Ma’lum bo‘lishicha, «Manchester Siti» bosh murabbiyii Xosep Gvardiola «Real»ga qarshi kechgan CHL yarim finali javob o‘yinidan oldin eski qadrdoni - «Barselona» ustozi Xaviga qo‘ng‘iroq qilgan va bir savolga javob olishni istagan...
Qiziq, taktikalar qiroli sanalgan Pepni qaysi masala qiynagan?
Gap shundaki, Madridda bo‘lgan dastlabki o‘yin davomida Vinisius Junior «Manchester Siti» himoyasiga katta muammo tug‘dirdi, mehmonlar tinkasini quritdi. Shunday ekan, Pep uchun javob bahsida braziliyalikni zararsizlantirish o‘ta muhim edi. El Nacional nashri ma’lumotiga ishonsak, ispaniyalik murabbiy Xavi bilan ayni shu masalada bog‘lanib, Vinisius tomonidan bo‘ladigan xavfni qanday bartaraf etish mumkinligi haqida gaplashgan. Binobarin, Vini joriy mavsum «Barselona»ga qarshi kechgan 4ta o‘yinda atigi 1ta gol urgan. Xavi braziliyalikni to‘xtatish yo‘lida Ronald Arauxo xizmatidan foydalanganini ham eslatish joiz.
Xavining Pepga qanday maslahat bergani noma’lum, muhimi, ikki murabbiy muhokamasi samarasiz ketmagandek. Har holda, Vinisius «Ittihod»da mutlaqo ojiz ko‘rindi butun «Real» kabi. Natijada «shaharliklar» «Qirollik klubi»ni 4:0 hisobida dog‘da qoldirib, CHL finaliga yo‘l ochishdi.
Vinisius Juniorning «Etixad stedium»dagi statistikasi:
* Darvoza tomon zarba - 1ta (noaniq)
* Xavfli vaziyat - 0
* Omadsiz yakkama-yakka kurash - 2ta
«MYU»ning afsonaviy himoyachisi Rio Ferdinand yarim final javob o‘yinidan so‘ng Britaniya televideniyesidagi jonli efirida Gvardiola yuborgan SMS-xabarni o‘qib berdi. Aytishicha, Pep xabarni unga uchrashuvdan oldin yuborgan ekan. SMS matni juda qisqa: «Menga ishon, biz g‘alaba qozonamiz». Demakki, ispaniyalik murabbiy Ispaniya klubi to‘sig‘idan o‘tishiga mutlaqo ishongan.
