So‘nggi xabarlarga ko‘ra, Lionel Messiga Saudiya Arabistoni klubi yiliga 1 milliard funtlik shartnoma taklif qilgan. Foot Mercato'ning yozishicha, agarda Messi bu taklifni qabul qilsa, u holda arentinalik Ronaldudan ko‘ra, ikki barobar ko‘p maoshga ega bo‘lishi mumkin. Shuningdek, Messining O‘rta sharqqa tashrifi, uning Ronaldu bilan raqobatini qaytadan tiklaydi. Ya’ni, bir chempionatda bu afsonalar o‘zaro raqib bo‘lgan klublar sharafini himoya qiladi.

Yuqoridagi ehtimolga qaramasdan, Messi oldida La-ligaga qaytish varianti ham mavjud. U yana "Barselona" safida to‘p tepishi mumkin. Kataloniya klubiga bu borada Devid Bekxem klubi yordam beradi. Fransuz matbuotida tarqalgan xabarlarga ko‘ra, "Inter Mayami" jamoasi Messi bilan bitim tuzadi va yangi mavsum oldidan uni "Barselona"ga ijara asosida beradi. Uning ijara davri olti oydan 18 oyga qadar davom etadi va yakunda u MLSga doimiy ravishda qaytib ketadi.
Messining "PSJ"dan ketishi aniq bo‘lib ulgurgan. Shu sababdan u parijliklarning chempionlik paradida ham qatnashmagan. "Barselona" bosh murabbiyi Xavi Messining qaytishiga qattiq ishonmoqda.

U bu haqida shunday deydi: "Muxlislarimiz jamoaning har bir o‘yinida Messi nomini aytib, kuylashmoqda. Bu menga yoqadi. Ammo Leoning qaytishi faqat uning o‘ziga bog‘liq. Men qaytishni 99 foizi Messiga bog‘liq deb bilaman. Futbol nuqtayi nazaridan shunday. Lekin bu yerda boshqa omillar ham bo‘ladi".
Lionel Messi o‘z sevimli jamoasida harakat qilishi uchun tekinga o‘ynashga ham rozi bo‘lishi aytilgan. Bu haqida jurnalist Ben Yakobs shunday yozadi: "Messi hech bir ikkilanishlarsiz "Barsa"da tekinga o‘ynay oladi. Hech bo‘lmasa, u moashining katta qismidan voz kechishi kerak. "Barselona"ning moliyaviy muammolari Messining qaytishini qiyinlashtiradi. Buning uchun futbolchi sotishga ham to‘g‘ri kelishi mumkin".

ISMATOV J.