Professional boksning birinchi yarim yengil vazn toifasida sobiq jahon chempioni Murodjon Ahmadaliyev navbatdagi raqibiga aniqlik kiritildi.

Matchroom kompaniyasi Marlon Tapalesdan uchralgan mag‘lubiyatdan so‘ng revansh so‘rab, WBA tashkilotiga murojaat yo‘llagan. Shuningdek, Marlon Tapalesning jamoasi ham 25 iyul kuni WBC va WBO kamarlari uchun bo‘lib o‘tadigan Naoya Inoue va Stiven Fulton bahsi g‘olibiga qarshi mutlaq chempionlik jangida ishtirok etishni so‘ragan.

WBA qaroriga ko‘ra, Murodjon Ahmadaliyev navbatdagi jangini yaponiyalik Tomoki Kamedaga qarshi “eliminator” maqomida o‘tkazishi belgilangan. Bahs g‘olibi esa hozirda Marlon Tapalesga tegishli bo‘lgan kamar uchun majburiy da’vogarga aylanadi. Shu bilan birga Tapalesga keyingi da’vogarni erkin tanlash imkoniyatini taqdim etilgan. Filippinlik bokschi Fulton — Inoue jangi g‘olibiga qarshi ringga chiqmoqchi.

Ahmadaliyevning raqibi yaponiyalik Kameda faoliyati davomida 43 ta jang o‘tkazib, 40 ta g‘alabaga erishgan. Tomoki hozirda WBA reytingida birinchi, IBF va WBO reytingida 9-o‘rinda bormoqda.

Murodjon aprel oyida filippinlik Marlon Tapalesga qarshi jangda mag‘lubiyatga uchrab, WBA va IBF kamarlarini boy bergandi.