"Liverpul" "Brayton" yarim himoyachisi Aleksis Makallister bilan shartnoma imzolaganini e’lon qildi.

24 yoshli argentinalik futbolchi jismoniy tibbiy ko‘rikdan o‘tgan va uzoq muddatli shartnoma imzolagan.

Kelishuv summasi oshkor etilmadi, biroq insayder Fabrisio Romano bu transfer 35 million funt sterlingga tushganligini ma’lum qildi.

"Tuyg‘u aql bovar qilmaydigan, orzu haqiqatga aylandi. Bu yerda ekanligimdan xursandman va jamoa bilan birga ishlashni intiqlik bilan kutmoqdaman.

Bu men uchun ajoyib yil bo‘ldi – Jahon chempionati, "Brayton" bilan erishgan yutuqlarimiz – ammo endi "Liverpul" haqida o‘ylash va har kuni yaxshiroq o‘yinchi va yaxshiroq inson bo‘lishga harakat qilish vaqti keldi" - dedi Makalisster.

Makallister 2019 yildan beri "Brayton"da o‘ynab kelayotgandi va 8 million yevroga sotib olingandi. Aleksis jamoa safida 112 o‘yin o‘tkazib, 20 gol va 9 golga assistentlik qilgan.