«Fotih Karagyumryuk» yarimhimoyachisi Otabek Shukurov O‘zbekiston milliy jamoasining 4-kungi mashg‘ulotlariga kelib qo‘shildi.

 U Turkiyada yakunlangan mavsum, CAFA Osiyo kubogi va JCH saralashiga tayyorgarlik vazifasini bajarishi haqida fikrlari bilan o‘rtoqlashdi. 

— Turkiya chempionatidagi birinchi yilingiz qanday o‘tdi?  

— Turkiyadagi birinchi mavsumimni yakunladim, taassurotlarim juda ham ajoyib. Chunki Turkiyada Yevropa futboli nafas olyapti. Jamoamiz bilan kuchlilar safiga qo‘shilishga maksimal harakat qildik. 19-20 jamoa ichida mavsumni 7-o‘rinda yakunladik.  Inshaalloh, klub bilan yana 1 yillik shartnomam bor.

— Bosh murabbiy Andrea Pirloning jamoadan ketishi? 

— Juda katta o‘zgarish bo‘ldi, ko‘plar ketdi. O‘ylashimcha birinchi navbatda oilaviy jihatlar ta’sir qildi, deb o‘ylayman. Yoki Turkiyaga moslasha olmadimi yoki klub bilan o‘zaro kelishuv bo‘ldimi, bundan aniq xabarim yo‘q. Undan keyingi jarayonda ko‘rgan bo‘lsangiz, 3 o‘yinda 7 ochko to‘pladik. Bu — ijobiy xolat. 

— CAFA haqida nima deysiz? 

— Inshaalloh, FIFA kunlarida muxlislarimiz oldida bo‘layotgan turnir orqali rasmiy o‘yinlarga tayyorgarlik ko‘rib boramiz. Asosiysi Osiyo Kubogi va jahon chempionati saralashiga munosib tayyorgarlik ko‘rishimiz kerak. Shuning uchun o‘ylaymanki, hozirgi vaqt — biz uchun berilayotgan imkoniyat, har bir harakat Osiyo Kubogida o‘z natijasini ko‘rsatadi deb o‘ylayman. 

— Milliy jamoa yarimhimoyasidagi kuchli raqobat haqida nima deya olasiz? 

— Milliy jamoa bo‘lganidan keyin raqobat bo‘lgani yaxshi. Raqobat bo‘lmasa, futbol rivojlanmaydi, milliy jamoa ham kuchaymaydi. Albatta, milliy jamoada raqobat qanchalik kuchaysa, shundagina uning darajasi ham kuchayadi.  

— Guruhdagi qaysi raqibni milliy jamoamiz uchun xavfliroq deb hisoblaysiz? 

— Aniq bir jamoani ayta olmayman. Bu futbol, har bir raqib jiddiy. Raqibni jiddiy deb hisoblamasak, o‘yinda ham, jamoada ham pasayish bo‘ladi. Jiddiy raqib deb qabul qilmaslikning o‘zi noprofessional harakat bo‘ladi. 

— Nisbatan qay biri?

— 1-jamoani aytaman (kuladi) chunki ilk o‘yinimiz ular bilan. 

— Demak, Ummon?

— Ha, Ummonga jiddiy tayyorgarlik ko‘rishimiz kerak. Har qalay O‘zbekistonda muxlislar va ota-onamiz oldida o‘ynaymiz. 

O‘zbekiston CAFA turniridagi birinchi o‘yinini 11 iyun kuni stadionida Ummonga qarshi o‘tkazadi.