O‘mon terma jamoasi bosh murabbiyi Branko Ivanovich O‘zbekistonga qarshi bo‘lib o‘tgan CAFA Nation's Cup doirasidagi o‘yindan so‘ng matbuot anjumanida ishtirok etdi.

"O‘zbekistonni haqli g‘alaba bilan tabriklayman. Vakillaringiz bizdan ko‘p jihatlarda yaxshi o‘yin namoyish etdi. Keyingi o‘yinimiz Tojikistonga qarshi bo‘ladi. Biz o‘yindan-o‘yinga rivojlanib borishga harakat qilamiz.

Raqib bizdan kuchli bo‘lgani uchun o‘yin uslubi borasida deyarli hech narsa ko‘rsata olmadik. O‘zbekiston juda yaxshi harakat qildi.

Bizda mavsum yakunlangani sabab futbolchilar o‘z o‘yinini ko‘rsata olmadi. Sizlarda esa aksincha, mavsum o‘zining qizg‘in pallasiga kirib bormoqda. Shu jihat ham o‘yinga ta’sir ko‘rsatdi.

O‘zbekiston jamoa sifatida yaxshi shakllanib bormoqda. Ularning so‘nggi uchta uchrashuvini ko‘rib chiqdik. Osiyo darajasida olib qaraganda sizlarda yaxshi jamoa bor.

Bilishimcha, Eronda ham chempionati yakunlangan. O‘zbekiston va Eron o‘rtasida qaysi terma kuchli ekanligini bilmayman. Ikkala jamoa ishtirokidagi bahs qizg‘in bo‘ladi.

Bugun bizning tarkibimizda eng yaxshi holatdagi futbolchilar maydonga tushdi. Tarkibga jalb qilingan barcha futbolchilarga ishonaman. O‘zbekiston bugun bizning kamchiliklarimizni topa oldi. Keyingi bahsda shu jihatlar ustida ishlaymiz", — dedi Branko Ivanovich.