Ўмон терма жамоаси бош мураббийи Бранко Иванович Ўзбекистонга қарши бўлиб ўтган CAFA Nation's Cup доирасидаги ўйиндан сўнг матбуот анжуманида иштирок этди.

"Ўзбекистонни ҳақли ғалаба билан табриклайман. Вакилларингиз биздан кўп жиҳатларда яхши ўйин намойиш этди. Кейинги ўйинимиз Тожикистонга қарши бўлади. Биз ўйиндан-ўйинга ривожланиб боришга ҳаракат қиламиз.

Рақиб биздан кучли бўлгани учун ўйин услуби борасида деярли ҳеч нарса кўрсата олмадик. Ўзбекистон жуда яхши ҳаракат қилди.

Бизда мавсум якунлангани сабаб футболчилар ўз ўйинини кўрсата олмади. Сизларда эса аксинча, мавсум ўзининг қизғин палласига кириб бормоқда. Шу жиҳат ҳам ўйинга таъсир кўрсатди.

Ўзбекистон жамоа сифатида яхши шаклланиб бормоқда. Уларнинг сўнгги учта учрашувини кўриб чиқдик. Осиё даражасида олиб қараганда сизларда яхши жамоа бор.

Билишимча, Эронда ҳам чемпионати якунланган. Ўзбекистон ва Эрон ўртасида қайси терма кучли эканлигини билмайман. Иккала жамоа иштирокидаги баҳс қизғин бўлади.

Бугун бизнинг таркибимизда энг яхши ҳолатдаги футболчилар майдонга тушди. Таркибга жалб қилинган барча футболчиларга ишонаман. Ўзбекистон бугун бизнинг камчиликларимизни топа олди. Кейинги баҳсда шу жиҳатлар устида ишлаймиз", — деди Бранко Иванович.