45-daqiqa: «Genk», 46-daqiqa: «Yunion», 89-daqiqa: yana «Genk» va 90+4-daqiqa: «Antverpen» - bu Belgiya chempionati yakuniy turida «oltin» uchun borgan kurash xronikasi.
Oddiy aytganda, Mark van Bommel boshqaruvidagi «Antverpen» fantastik ssenariy asosida Belgiya chempioniga aylandi! Klub 1957 yildan buyon birinchi marta chempionlikka erishganini alohida ta’kidlash kerak. «Antverpen» «pley-off» bosqichining so‘nggi turidan oldin ham turnir jadvalida peshqadam edi, lekin parallel ravishda o‘tgan ikki o‘yin davomida 1-o‘rin egasi tez-tez o‘zgarib turdi.
Yakuniy tur arafasida Yupiler liga (Pro-liga) bosh direktori kubok va oltin medallar bilan vertolyotda havoga ko‘tarilishi va voqealar rivojini kuzatib borib, chempion qayerda aniqlansa, o‘sha yerga uchishini aytgandi. Finish marrasida «Antverpen», «Yunion» va «Genk» chempionlikdan umidvor edi. E’tiborlisi, «Genk» aynan «Antverpen»ni qabul qilgan bo‘lsa, «Yunion» o‘z maydonida hech narsaga da’vosi qolmagan «Bryugge» bilan o‘ynadi. Turnir jadvali (so‘nggi tur oldidan):
«Antverpen» - 46 ochko
«Yunion» - 46 ochko
«Genk» - 45 ochko
«Bryugge» - 33 ochko
Oxirgi o‘yinlarning birinchi bo‘limi yakunida «Genk» hisobni ochdi va jadvalda 3-o‘rindan 1-qatorga sakradi:
«Genk» - 48 ochko
«Yunion» - 47 ochko
«Antverpen» - 46 ochko
Tanaffusdan keyin «Yunion» darhol «Bryugge» darvozasini nishonga oldi va onlayn-jadvalda yangi yetakchiga aylandi:
«Yunion» - 49 ochko
«Genk» - 48 ochko
«Antverpen» - 46 ochko
58-daqiqada «Antverpen» hisobni tenglashtirdi va 2-o‘ringa ko‘tarildi. 75-daqiqada esa «Genk» - «Antverpen» o‘yinida mezbonlar ikkinchi golni urishdi - 2:1. Xullas, o‘yinlarning asosiy vaqti tugashi arafasida ham «Yunion» 1-o‘rinda edi. Biroq jamoa shundan so‘ng qandaydir falokatga yuz tutdi: 89, 90}3 va 90}10-daqiqalar «Bryugge»dan 3ta gol qabul qildi. Bu vaqtda Genkdagi uchrashuvning 90}4-daqiqasida o‘sha mashhur Tobi Alderveyreld «Antverpen»ni 3-o‘rindan 1-pog‘onaga ko‘targan «oltin gol» muallifiga aylandi:
«Antverpen» - 47 ochko
«Genk» - 46 ochko
«Yunion» - 46 ochko
