Tojikiston yig‘in doirasida “Andijon” bugun, 14 iyun kuni navbatdagi o‘rtoqlik uchrashuvida maydonga tushadi. Bu safar jamoa Xo‘jandning “Esxata” klubi bilan bellashadi.

Ma’lumot uchun, ayni chog‘da ushbu jamoa Tojikiston oliy ligasida “Istiqlol”dan keyin 2-o‘rinni egallab turibdi. “Esxata” 12 ta o‘yinda 7 g‘alaba, 1 durang va 4 mag‘lubiyat qayd etgan. To‘plar nisbati esa 17-12, jamoa hisobida 22 ochko bor.

3 iyun kuni Tojikiston oliy ligasining 13-turida “Esxata” safarda Kulobning “Ravshan” jamoasi darvozasiga javobsiz 3 ta gol urgan holda g‘alaba qozondi. Roman Xibaba, Dilshod Karimov va Olimjon Karimov tomonidan kiritilgan gollar “Esxata”ga uch ochko keltirdi.

Shuningdek, “Esxata”da o‘zbekistonlik futbolchilar ham to‘p surishadi. Uzoq yillar davomida “Sho‘rtan” sharafini himoya qilgan Olimjon Karimov, ilgari “Bunyodkor”da o‘ynagan Sanjar Rixsiboyev bugungi kunda mazkur klub sharafini himoya qilishyapti. Qolaversa, yana bir o‘zbekistonlik o‘yinchi Shaxzod Ma’murjonov ham “Esxata”da to‘p tepmoqda. Klubda hamyurtlarimizdan tashqari yana ikki nafar legioner bo‘lib, bular – rossiyalik darvozabon Vyacheslav Shevchenko hamda himoyachi Roman Xibaba. Aynan “Ravshan” jamoasiga qarshi bellashuvda Xibaba bellashuvning eng yaxshi futbolchisi deb topildi.

Darvoqe, “Esxata” bosh murabbiyi sifatida rossiyalik Igor Surov faoliyat olib boryapti. Shu yilning 16 noyabr kuni 38 yoshini qarshilaydigan Igor Aleksandrovich “Esxata”da o‘tgan yildan beri faoliyat ko‘rsatib kelyapti.

"Andijon"ning “Esxata”ga qarshi uchrashuvi mezbonlarning “Spartak” nomli stadionida bo‘lib o‘tadi.  O‘yin 18:00 da boshlanadi.

“Andijon” matbuot xizmati.